Rafu yamwondoa Kessy Simba

• Safari ya Azam, Yanga yanukia
• Tippo adai watafanya biashara na timu yoyote

RAFU mbaya aliyoicheza beki mahiri wa Simba, Hassan Kessy dhidi ya mchezaji wa Toto African, Edward Christopher, imemsababishia kutemwa kuitumikia timu yake hiyo hadi mwisho wa msimu huu.

Kessy alimchezea rafu Christopher kwenye mchezo wao wa Ligi Kuu mwishoni mwa wiki iliyopita na kusababisha kutolewa nje kwa kadi nyekundu, huku uongozi wa Simba ukimuongezea adhabu ya kukosa michezo yote iliyobaki katika Ligi Kuu Tanzania Bara.

Mbali na kusimamishwa kwa mchezaji huyo, tayari kuna tetesi za kuikacha klabu hiyo na kujiunga na kati ya klabu ya matajiri wa Bongo, Azam au Watoto wa Jangwani, Yanga, licha ya tetesi hizo kutokuwekwa wazi.

Inadaiwa timu hizo Azam na Yanga zilikuwa zinasubiri kumalizika kwa michezo yao ya kimataifa ya marudiano kati ya timu za Esperance na Kombe la Shirikisho na Al Ahly mchezo wa Ligi ya Mabingwa Afrika, ili zianze mchakato wa kumnasa beki huyo ambaye mkataba wake unaisha mwezi Juni.

Akizungumza na MTANZANIA jana, Kessy alisema bado uongozi haujampa taarifa zozote za kusimamishwa kwake.

“Sijapewa taarifa yoyote, lakini kama wameamua kunipa adhabu sawa nitaitumikia kwa kuwa bado ni mchezaji wao na bado nina mkataba nao, ila nikimaliza mkataba wangu mwezi wa sita meneja wangu ataamua kama nitabaki au nitaondoka,” alisema.

Kwa upande wa meneja wake Athuman Tippo, alisema wamepokea maamuzi ya uongozi huo kumsimamisha mchezaji wake na ataitumikia adhabu hiyo kama ilivyoamuliwa kwa kuwa ni mwajiriwa wao.

“Ataitumikia adhabu yake hadi atakapomaliza mkataba, lakini bado tunaendelea kusubiri adhabu watakayompa Vicent Angban na wasipofanya hivyo tutaendelea na msimamo wetu wa kuchukua hatua zaidi, tutakaa na mwanasheria na kupanga nini tufanye baada ya kipa huyo kujichukulia sheria mkononi kumpiga Kessy,” alisema.

Alisema hadi sasa bado hawajafanya mazungumzo na timu yoyote nyingine, lakini Kessy akimaliza mkataba wake atakuwa huru hivyo watafanya biashara na timu yoyote itakayomtaka.

Kessy jana alitangazwa na Mkuu wa Idara ya Habari na Mawasiliano wa Simba, Haji Manara, kuwa atakosa michezo yote iliyobaki katika ligi, akieleza alionekana kucheza rafu mbaya ambayo ingeweza kumsababishia kifo mchezaji huyo wa Toto.

“Kessy ameihujumu timu kwenye mchezo huo kwa rafu mbaya aliyoicheza, iliyosababisha kupewa kadi nyekundu kwani hakuwa na sababu ya kucheza vile alionekana kabisa ameinua mguu sijui ni makusudi au bahati mbaya, angeweza kumsababishia hata kifo Edward, hivyo tumeamua kumuongezea adhabu badala ya kukosa mechi mbili kwa kadi aliyopewa atazikosa mechi zote tano,” alisema.

Hata hivyo, mchezaji huyo mbali ya kucheza rafu hiyo iliyomuondoa Simba, alikuwa anaandamwa na jinamizi la kutoaminika tena Simba tangu alipoigharimu klabu yake katika mechi ya mzunguko wa pili wa Ligi Kuu Tanzania Bara, kati ya Simba na Yanga iliyochezwa Februari 20 kwa kuokoa mpira kizembe ambao ulinaswa na mshambuliaji wa Yanga, Donald Ngoma na kufunga bao kirahisi.

Na Mwali Ibrahimu/ Mtanzania

Video : Mafoto

Read More

Simba kushiriki michuano ya kimataifa

TIMU ya Simba imethibitisha kushiriki michuano ya Kombe la Nile Basin Championship, itakayoanza Mei 22 mwaka huu nchini Sudan.

Katika mashindano hayo mwaka huu, bingwa atajinyakulia zawadi ya dola za Kimarekani 30,000 sawa na Sh 65,697,000 huku mshindi wa pili akizawadiwa dola 20,000 (sawa na Sh 43,798,000 wakati mshindi wa tatu akipata dola za Kimarekani 10,000 (sawa na Sh 21,899,000).

Kwa mujibu wa taarifa iliyotolewa Dar es Salaam jana na Shirikisho la Soka Tanzania (TFF), mashindano hayo hushirikisha timu zilizomaliza ligi zikiwa nafasi ya tatu na kwa kuwa Simba katika msimu uliopita ilimaliza Ligi Kuu Tanzania Bara katika nafasi hiyo, hivyo wamepewa jukumu la kuiwakilisha Tanzania katika mashindano hayo.

Mashindano ya Nile Basin yanashirikisha klabu kutoka katika nchi wanachama wa Cecafa ambazo ni Burundi, Djibouti, Ethiopia, Kenya, Sudan, Sudan Kusini, Tanzania Bara na Zanzibar

Kwa mara ya kwanza Tanzania iliwakilishwa na Mbeya City katika mashindano hayo yanayoandaliwa na Baraza la Vyama vya Soka Afrika Mashariki na Kati (Cecafa) mwaka 2014, ambapo wakiwa chini ya kocha wao, Juma Mwambusi, ilijikuta ikiishia hatua ya robo fainali.

Mbeya City ilifanikiwa kuingia katika hatua hiyo ya robo fainali kwa jumla ya pointi 4 nafasi ya pili lakini ikajikuta ikitolewa na Victoria University kwa bao 1-0 ambaye pia ndiye bingwa mtetezi wa michuano hiyo kwa mwaka 2014 baada ya kuwafunga AFC Leopards ya Kenya kwa mabao 2-1 katika mchezo wa fainali.

NA ZAINAB IDDY/HABARI LEO

Read More

Kipa wa zamani wa Simba Dhaira amefariki

Aliyekuwa kipa nambari moja wa timu ya Simba na Uganda Abel Dhaira ameaga dunia.

Dhaira mwenye umri wa miaka 28 alikuwa anaugua saratani.

Dr. Bernard Ogwel, wa shirikisho la soka nchini Uganda FUFA ameithibitishia BBC kuwa kipa huyo alivuta pumzi yake ya mwisho akiwa Iceland.

"Ni jambo la kuhuzunisha sana kuwa Dhaira ametuacha kwetu kama waganda na pia kwa Familia yake''

Dhaira alikuwa amejiunga na klabu ya IBV Vestmannaeyjar ya Iceland alipogunduliwa kuwa anaugua saratani katika miezi ya hivi karibuni.

Kipa huyo alianza kuichezea Uganda Cranes mwaka wa 2009 alipoisaidia timu hiyo kutwaa kombe la CECAFA Senior Challenge 2012.

Afya yake ilidhoofika Januari mwaka huu na akalazwa katika hospitali ya Nsambya kabla ya kurejea Iceland kwa matibabu zaidi.

Kocha wake wa IBV Vestmannaeyjar, Bjarni Johannsson alikuwa ameahidi kumsaidia kwa hali na mali wakati huu anapokabiliwa na maradhi.

Dhaira aliwahi kuichezea Express FC ya Uganda kabla ya kujiunga na AS Vita ya DR Congo na kisha Simba FC ya Tanzania.

BBC Swahili

Read More

Simba yamalizia hasira Singida Utd

Mshambuliaji wa Simba, Brian Majwega akikwepa mguu wa mchezaji wa Singida United, Ponzi Mgeni wakati wa mechi yao ya Kombe la Shirikisho kwenye Uwanja wa Taifa Dar es Salaam jana.

SIMBA jana ilimaliza hasira za kufungwa na Yanga kwa Singida United baada ya kuichapa mabao 5-1 na kutinga hatua ya robo fainali ya michuano ya Kombe la FA.

Mechi hiyo ni ya kwanza kwa Simba tangu itoke kupokea kichapo cha mabao 2-0 kutoka kwa mtani wake Yanga katika mechi ya Ligi Kuu bara iliyochezwa kwenye Uwanja wa Taifa Dar es Salaam Februari 20 mwaka huu.

Simba ilitawala asilimia kubwa ya mchezo wa jana tangu mwanzo wa kipindi cha kwanza na kwenda mapumziko ikiwa mbele kwa mabao 2-0.

Dan Lyanga aliiandikia Simba bao la kuongoza katika dakika ya tatu kabla Hamisi Kiiza hajaongeza la pili katika dakika ya 21.

Kiiza alifunga bao hilo baada ya kipa wa Singida United, Jacton Munna kuanguka ambapo aliuwahi mpira na kuujaza wavuni.

Kiiza aliifungia Simba bao la tatu katika dakika ya 66 kwa kichwa baada ya kuunganisha pasi ya Brian Majwega. Bao la nne la Simba liliwekwa kimiani na Awadhi Juma katika dakika ya 83 na dakika tatu baadae alifunga bao la tano.

United ilipata bao la kufutia machozi katika dakika ya 90 likifungwa na Paul Malamla. Aidha Simba ingeweza kupata mabao mengi jana kama washambuliaji wake wangezidisha umakini kwani walikosa mabao ya wazi mfululizo.

Kiiza alikosa bao dakika ya 13 na Lyanga alikosa dakika ya 16 baada ya wote kupiga mipira nje wakiwa kwenye nafasi nzuri ya kufunga.

Kutoka kwenye uwanja wa CCM Kirumba Mwanza mwandishi Alexandra Sanga anaripoti wenyeji Toto Africans walishindwa kutumia vema uwanja wao baada ya kuchachapwa bao 1-0 na Geita Gold.

Bao la Geita lilifungwa na Chibuga Chibuga katika dakika ya 64 baada ya kupata pasi ya Juma Nade.

 GRACE MKOJERA / HABARI LEO

Read More

Makocha watambiana

ZIKIWA zimesalia siku tatu kabla ya pambano la watani wa jadi Simba na Yanga, makocha wa timu hizo wameonesha kuogopana huku kila mmoja akidai kuheshimu kikosi cha mwenziwe.

Yanga imejichimbia Pemba na Simba imejichimbia Morogoro kwa maandalizi ya mechi hiyo ya Jumamosi.

Akizungumza na gezeti hili jana, kocha wa Yanga Hans van Pluijm alisema anafahamu ugumu wa mechi, lakini yeye anaendelea na programu yake ya kusaka ushindi kama kawaida.

“Mimi nakiandaa kikosi changu kwa ushindi kama ilivyo kwenye mechi zote tunazocheza, siandai kikosi changu kwa vile nacheza na Simba, hapana… najua mimi ni bingwa mtetezi nitakutana na ushindani mkubwa lakini nia yangu ni kushinda bila kujali nacheza na nani,” alisema.

Mechi ya mwisho ya ligi ya Yanga ilikuwa dhidi ya JKT Ruvu, ambapo ilishinda mabao 4-0. Pluijm alisema lengo lake ni kuendelea na ushindi.

“Najua kwa sasa ligi ni ngumu sana, kila timu inataka kushinda hasa inapokutana na timu yetu (Yanga) naandaa kikosi changu kushinda, naiheshimu Simba lakini hiyo haifanyi nishindwe kuhakikisha timu yangu inashinda,” alisema.

Kwa upande wa kocha wa Simba, Jackson Mayanja alisema kikosi chake kimejipanga kushinda Jumamosi.

“Tutaingia uwanjani kusaka pointi tatu kama tunavyofanya kwenye mechi zote, mechi ya Yanga tunaichukulia kama ilivyo mechi nyingine yoyote kwenye ligi sasa pointi tatu ni lazima,” alisema.

Tangu kuwa chini ya Mayanja, Simba imekuwa ikipata mfululizo hali iliyorudisha morali kwa wcahezaji na wapenzi wake na kuamini kwamba inaweza kufanya vizuri zaidi na kutwaa ubingwa.

“Kitu kama morali ambacho sikukikuta kwa wachezaji wangu nilipoanza kuwafundisha sasa naona kimerejea na kila mmoja unamwona ana tamaa ya ushindi nami nataka hilo liendelee,” alisema. “Tumeshapanga mikakati yetu na nimewaambia wachezaji wangu kwamba tunacheza mechi ya Yanga sio kutaka kulipa kisasi bali kutaka kupata pointi tatu, na hilo ndilo litakalokuwa,” alisema.

Katika mzunguko wa kwanza timu hizo zilipokutana Yanga ilishinda mabao 2-0.

Habari Leo

Read More

Jonesia kuamua Simba na Yanga

MWAMUZI Jonesia Rukiyaa wa mkoani Kagera, amepewa jukumu la kuchezesha mechi ya watani wa jadi Simba na Yanga, katika mchezo wao unaotarajiwa kuchezwa  Jumamosi hii Uwanja wa Taifa, Dar es Salaam.

Mwamuzi huyo mwenye beji ya Fifa, anaingia uwanjani kuzichezesha timu hizo kwa mara ya pili baada ya kuzihukumu katika mechi ya Nani Mtani Jembe 2014 ambao Simba iliibuka na ushindi wa bao 2-0.

Katika mchezo huo unaosubiriwa kwa hamu na mashabiki, Jonesia atasaidiana na Josephat Mburali (Tanga) na Samwel Mpenzu (Arusha), huku mwamuzi wa akiba akiwa ni Eli Kasihili wa Dar es Salaam,  wakati kamishna wa mchezo huo akiwa Khalid Mutego kutoka Mwanza.

Wakati huo huo, Shirikisho la Soka nchini (TFF), jana lilitangaza viingilio katika mchezo huo huku kiingilio cha chini kikiwa ni Sh 7,000.

Ofisa Habari wa TFF, Baraka Kizuguto, alisema kwa viti vya machungwa kiingilio kitakuwa  Sh 10,000 , VIP C na B ikiwa  ni Sh 20,000  huku VIP A ikiwa Sh 30,000.

Alisema tiketi zitaanza kuuzwa Ijumaa  katika vituo mbalimbali ikiwemo kwenye Ofisi za TFF Karume, Kidongo Chekundu, Uwanja wa Taifa, Dar Live, Buguruni sheli, Ubungo Oil Com, Steers, Feli na kituo cha mabasi Makumbusho.

Kizuguto aliwataka wadau pamoja na wapenzi wa mpira kununua tiketi hizo katika sehemu husika, ili kuepukana na matatizo ya kununua tiketi ambazo sio halali.

“Tunawaomba mashabiki kujitokeza kwa wingi katika siku hiyo, ili kila mmoja aweze kuburudika na kushangilia timu yake ambapo ulinzi utakuwepo na umeimarika kwa kushirikiana na vyombo vya usalama,” alisema.

THERESIA GASPER, NA SUZANA MAKORONGO (RCT)

MTANZANIA

Read More

Mayanja asuka mkakati kuimaliza Yanga

KOCHA wa Simba, Jackson Mayanja, amesema anaandaa mbinu mpya ili aweze kuifunga Yanga katika mchezo wao wa mzunguko wa pili wa Ligi Kuu Tanzania Bara utakaochezwa Jumamosi hii katika Uwanja wa Taifa, Dar es Salaam.

Mayanja ambaye ana rekodi nzuri katika kikosi hicho tangu alipoanza kukifundisha Januari mwaka huu baada ya Dylan Kerr kutimuliwa, amepanga kutumia mbinu mbadala ili waweze kuifunga Yanga na kulipiza kisasi.

Timu hizo zilipokutana katika mzunguko wa kwanza, Yanga ambao ni mabingwa watetezi wa Ligi Kuu Bara, waliibuka kidedea kwa kuwanyuka watani wao hao mabao 2-0.

Akizungumza na MTANZANIA mjini hapa, Mayanja alisema ameandaa programu kwa ajili ya Yanga kwani anahitaji ushindi ili waweze kujiweka katika mazingira mazuri kwenye msimamo wa ligi hiyo.

Alisema anaamini mchezo huo utakuwa mgumu kutokana na mahasimu wao kupata uzoefu katika michuano ya kimataifa ya Ligi ya Mabingwa Afrika baada ya juzi kuwafunga wapinzani wao Cercle de Joachim bao 1-0 walipocheza ugenini nchini Mauritius.

Kocha huyo raia wa Uganda, alisema mchezo huo umewasaidia Yanga kujiandaa dhidi yao na atahakikisha atatumia mbinu tofauti kuwakabili watani wao wa jadi baada ya kupata pointi sita katika Uwanja wa Kambarage, Shinyanga.

“Tutatumia mbinu tofauti kabisa ili kuhakikisha ushindi unapatikana, Yanga wanashiriki Ligi ya Mabingwa Afrika michuano ambayo imekuwa ni sehemu ya kujiandaa na mchezo dhidi yetu,” alisema Mayanja.

Simba inatarajia kuweka kambi mjini Morogoro kujiandaa na mchezo huo, ikiwa ni baada ya juzi kuibuka na ushindi wa mabao 2-1 dhidi ya Stand United katika mchezo uliopigwa katika Uwanja wa Kambarage, Shinyanga.

Matokeo hayo yameifanya Simba ifanikiwe kukaa kileleni mwa msimamo wa Ligi Kuu Tanzania Bara, baada ya kufikisha pointi 45 na kuishusha Yanga iliyopo nafasi ya pili ikiwa na pointi 43 huku Azam FC yenye pointi 42 ikishika nafasi ya tatu.

Mtanzania

Read More

‘Simba Tunataka ubingwa’

BEKI na Nahodha Msaidizi wa Simba, Hassan Isihaka amesema kwa sasa wanafanya vizuri katika Ligi Kuu Bara na mpaka wapinzani wao waje kushtuka tayari watakuwa kwenye ubingwa.

Isihaka alisema kwa sasa Simba wanaota ubingwa tu, hakuna jambo jingfine na kusema kuwa kwa kipindi chote tangu ameanza kuichezea Simba miaka minne iliyopita, inamuuma kuukosa ubingwa na kinachomshangaza, walikuwa wanacheza vizuri ila waliangushwa na bahati.

“Imani yangu ni kwamba msimu huu tutawafuta machozi mashabiki wa Simba kutokana na namna tunavyopata matokeo mazuri tunavyoshinda, maana awali, tulikuwa kama hatuna bahati kila tulipopambana hali ilikuwa ngumu.” Isihaka alisema na kuongeza:“Binafsi ninachokiamini, kufanya kwetu vizuri kasi yetu ni hadi tuchukue ubingwa, kama unavyojua wengine tangu tujiunge, Simba haijawahi kuchukua ubingwa huu.” 

Kuhusu wapinzani wao Yanga na Azam, beki huyo wa kati alisema wala hawaangalii wanafanya nini, akili zao kufanya yao ili kutimiza lengo la kutwaa ubingwa tu

Mwanaspoti

Read More

Simba yatakata TAIFA huku Yanga ikifungwa MKWAKWANI

• Simba leo imezidi kuwapa raha mashabiki wake baada ya kuibuka na ushindi wa mabao 4 - 0 dhidi ya African Sports uwanja wa Taifa Dar es salaam, huku Yanga ikilala kwa mabao 2 - 0 mbele ya Coastal Union uwanja wa Mkwakwani Tanga. 

Ushindi wa Simba ulipokelewa kwa furaha kubwa na mashabiki wa timu hiyo na umeifanya iendeleze rekodi nzuri ya ushindi katika mechi zake tatu mfululizo sasa.

Wiki za hivi karibuni Simba ilimuondoa kocha wake Dylan Kerr na kocha wa makipa, Iddi Salim kwa kilichoelezwa timu haichezi vizuri na jukumu kukabidhiwa Mganda Jackson Mayanja, ambaye alikuwa Kocha Msaidizi.

Huo ni ushindi wa pili mfululizo kwa Simba katika ligi hiyo ikiwa chi ya Mayanja baada ya mchezo wa kwanza kuifunga Mtibwa Sugar bao 1-0 wiki mbili zilizopita, lakini ni wa tatu mfululizo kwa kocha huyo baada ya Jumamosi wiki iliyopita kuifunga Burkina Faso mabao 3-0 iliyopo Ligi Daraja la Kwanza katika kuwania Kombe la Shirikisho Uwanja wa jamhuri Morogoro.

Kutokana na ushindi huo wa jana, Simba sasa imefikisha pointi 36 ikiendelea kushika nafasi ya tatu nyuma ya Azam inayoshika nafasi ya pili ikiwa na pointi 39 na Yanga inayoongoza ligi hiyo ikiwa na pointi 39, lakini ina uwiano mzuri wa mabao ya kufunga na kufungwa. Azam ipo nyuma mchezo mmoja.

Katika mchezo wa jana, Simba ilipata bao la kwanza dakika ya 14 mfungaji akiwa Hamisi Kiiza akimalizia krosi ya Hassan Ramadhan Kessy, kabla ya Kessy kuifungia Simba bao la pili dakika ya 30 baada ya kuwalamba chenga mabeki wa African Sports.

Simba iliendelea kufanya mashambulizi ya nguvu, huku Sports wakionekana kuzidiwa kila idara, ambapo dakika ya 42 Kiiza alifunga bao la tatu kutokana na uzembe wa beki Halfan Twenye aliyerudisha mpira kwa kipa wake  na Kiiza kuunasa.

Bao hilo la Kiiza lilikuwa la 12 kwake kufunga katika msimu huu akiendelea kuwa nyuma ya Amis Tambwe wa Yanga anayeongoza akiwa na mabao 13.

Sports ilijaribu mara chache kufurukuta, lakini umaliziaji haukuwa mzuri, ambapo wachezaji Pera Ramadhan na Rajabu Isihaka walishindwa kuzitumia.

Simba iliongeza bao la nne dakika ya 75 mfungaji akiwa Haji Ugando baada ya kupokea pasi ya Kessy na kuibua shangwe kwa mashabiki wa timu hiyo.

Wakati huohuo, Yanga jana ilipoteza mchezo wa kwanza katika ligi ya msimu huu baada ya kupokea kipigo cha mabao 2-0 Uwanja wa Mkwakwani, Tanga.

Yanga na Azam zilikuwa ndiyo timu pekee katika ligi hiyo msimu huu, ambazo hazifungwa mechi, hivyo kwa matokeo hayo imebaki Azam pekee.

Coastal ilipata bao la kwanza dakika ya 27 mfungaji akiwa Miraji Adamu kwa mpira wa adhabu baada ya beki Kelvin Yondani kuunawa mpira na kupiga adhabu hiyo iliyomshinda kipa Deogratias Munishi ‘Dida’.

Washambuliaji wa Yanga wakiongozwa na Donald Ngoma walijaribu kufukuta kutaka kusawazisha bao hilo, lakini umaliziaji ulikuwa butu.

Dakika ya 62, Juma Mahadhi alifunga bao la pili kwa shuti kali, bao ambalo liliwaamsha mashabiki wa Coastal, ambao matokeo hayo yamewafanya wafikishe pointi 13.

Naye Alexander Sanga anaripoti kutoka Shinyanga kuwa Mwadui imeibuka na ushindi wa bao 1-0 dhidi ya Toto Aficans mchezo uliofanyika Uwanja wa Mwadui.Bao hilo lilifungwa dakika ya 63 na Kelvin Kongwe kwa shuti la mbali.

Hicho ni kipigo cha nne mfululizo kwa Toto Africans baada ya kufungwa na African Sports, Prisons na Stand United.

Mchezo mwingine uliofanyika Uwanja wa Karume, Dar es Salaam, ambapo JKT Ruvu na Majimaji zilitoka 0-0.

Na Lenzi ya Michezo 

Read More

Mayanja aula mfupa uliomshinda Kerr

Dar es Salaam . Kocha wa Simba, Jackson Mayanja ameamua kucheza kamali iliyomshinda mtangulizi wake Dylan Kerr kwa kuamua kuwapa nafasi wachezaji Rafael Kiongera na Hassan Isihaka katika kikosi chake cha kwanza.

Kauli ya Mayanja imekuja wakati mashabiki wa klabu hiyo wakilalamikia kiwango cha Kiongera aliyerudishwa kwenye usajili wa dirisha dogo kuwa ni cha chini na hapaswi kupewa nafasi.

Isihaka amekuwa akilaumiwa kwa kushuka kiwango na mara kwa mara hunyooshewa kidole kuwa kuwa uzembe wake umekuwa ukiigharimu Simba.

Hata hivyo, Mayanja amedai kukoshwa na viwango cha wachezaji hao na ameahidi kuwa ataendelea kuwapa nafasi kwa sababu wanafanya kazi ambayo huwatuma.

Mayanja alisema haoni sababu kwa wachezaji hao kulaumiwa kwa sababu yeye kama kocha ndiye anayefahamu ubora na uwezo wa mchezaji mmoja mmoja kiufundi na siyo mashabiki.

“Isihaka amecheza mechi mbili mfululizo na hatujaruhusu bao na sioni tatizo lolote kutoka kwake.

Pia, Kiongera naamini ana kitu kikubwa kwa sababu anasaidia kuipeleka timu mbele sifa ambayo mshambuliaji anatakiwa kuwa nao.

Bado ni wachezaji ninaowaamini na wakiendelea kufanya vizuri nitazidi kuwapa nafasi,” alisema Mayanja.

Mayanja alisema kuwa falsafa yake ni wachezaji kuzingatia kile anachowaelekeza na yeye binafsi hawezi kuingia kwenye mkumbo wa kupangiwa kikosi na mtu yeyote<

 Charles Abel/Mwananchi

Read More

Mayanja aanza vizuri na Simba

Kocha Jackson Mayanja ameanza vyema kibarua chake Simba, baada ya kuiongoza timu hiyo kuichapa Mtibwa Sugar bao 1-0 kwenye Uwanja wa Taifa, Dar es Salaam.

Mshambuliaji Hamis Kiiza aliifungia Simba bao hilo pekee katika dakika ya tano akiunganisha kwa kichwa krosi ya Mohamed Hussein ‘Tshabalala’ na kumfanya Mayanja kutembea kifua mbele.

Ushindi huo umeifanya Simba kufikisha pointi 30 na kuziongezea presha Azam na Yanga zilizazoongoza ligi hiyo kwa sasa, huku wakishusha Mtibwa hadi nafasi nne.

Katika mchezo huo, Mtibwa ilionekana kuzidiwa na kushindwa kuhimili kasi ya mashambulizi ya washambuliaji wa Simba, lakini umakini mdogo wa Kiiza, Ajibu uliwanyima wenyeji hao nafasi ya kupata mabao mengi.

Kipindi cha pili, Mtibwa ilirudi kwa kasi na kufanya shambulizi kali dakika ya 52 baada ya Ibrahim Jeba kuambaa na mpira na kuachia shuti lililogonga mwamba na kurudi uwanjani na mabeki wa Simba kuokoa.

Kiungo Justice Majabvi wa Simba alionyeshwa kadi ya njano dakika ya 13, kwa kumchezea rafu Shiiza Kichuya, pia dakika ya 22 Henry Joseph wa Mtibwa alionyeshwa kadi ya njano kwa kumchezea rafu Peter Mwalyanzi.

Katika michezo mingine iliyochezwa jana, kocha Abdallah Kibadeni alishuhudia timu yake ya JKT Ruvu ikipokea kipigo cha mabao 5-1 kutoka kwa Mgambo JKT.

Stand United ilipata ushindi wa bao 1-0 dhidi ya Kagera Sugar, shukrani kwa goli lililofungwa na Revocatus Richard katika dakika ya 12.<

Coastal Union ililazimishwa sare 1-1 na Majimaji jijini Tanga. Coastal Union ilipata bao kupitia Absalim Chidiebele kabla ya Alex Kondo kuisawazishia Majimaji.

Jijini Mbeya wenyeji Mbeya City ilichapa Mwadui bao 1-0 lililofungwa na Ditram Nchimbi katika dakika ya 49, lakini         City ilipata pigo baada ya kiungo wake Haruna Moshi ‘Boban kuonyeshwa kadi nyekundu. Mshambuliaji Jeremia Juma aliingoza Prisons kuichapa Toto African bao 1-0 jijini Mwanza.

Read More

Simba yavunja Mkataba na Makocha wake

Simba sports club

Dar es salaam

12-1-2016

Taarifa kwa vyombo vya habari

Kwa masikitiko makubwa klabu ya Simba inawaarifu umma kupitia vyombo vya habari uamuzi wake wa kuvunja mikataba yake na makocha wake kocha mkuu Dylan Kerr na kocha wake wa makipa Iddi Salim.

Katika uamuzi wake uliofanywa mchana huu na kikao cha kamati ya utendaji ambapo makocha hao waliitwa klabu ya Simba na walimu hao kwa pamoja wamekubaliana kuvunja mikataba ya ajira zao kwa faida ya pande zote mbili.

Kwa sasa kocha msaidizi wa Simba Jackson Mayanja atakuwa na timu huku mchakato wa kumpata kocha mkuu ukiendelea..

Mwisho uongozi unawashukuru walimu hao kwa huduma waliyoitoa katika kipindi chote cha uwepo wao klabuni.

Imetolewa na Haji S.Manara

Mkuu wa mawasiliano wa klabu ya Simba.

Simba nguvu moja

Read More

Simba SC yazipigia hesabu Azam, Yanga

TIMU ya Simba imeanza kufufua matumaini ya kuwania taji la Ligi Kuu

Tanzania Bara baada ya jana kuifunga Ndanda FC bao 1-0 katika Uwanja wa Nangwanda Sijaona, mjini hapa.

Katika mchezo huo uliokuwa na upinzani wa aina yake, umeiwezesha Simba kuwakaribia Azam na Yanga walio juu katika msimamo wa ligi hiyo.

Katika mchezo huo Simba walikuwa wa kwanza kufika lango la Ndanda na dakika ya tatu Hamis Kiiza alipoteza nafasi ya kufunga.

Ndanda walijibu mapigo baada ya Salvatory Ntebe, kushindwa kufunga shuti la adhabu katika dakika ya nne.

Baadaye Ndanda walipata bao katika dakika ya nane kupitia kwa Atupile Green, lakini mwamuzi, Rajab Mrope kutoka Songea, alilikataa kwa kuwa tayari alikuwa ameotea.

Simba walipoteza nafasi ya kufunga katika dakika ya 16, baada ya Paul Kiongera kushindwa kuunganisha kwa kichwa krosi ya Brian Majwega.

Ndanda wangekuwa makini katika dakika ya 38 wangeweza kupata bao lakini shuti la Omary Mponda lilitoka nje.

Simba walikosa bao katika dakika ya 62 baada ya Kiiza kutaka kuunganisha kwa kichwa krosi ya Mohamed Hussein, lakini mpira uligonga mwamba.

Kiiza alipoteza nafasi nyingine ya kufunga katika dakika ya 73.

Lakini Ibrahim Ajibu aliyetokea benchi kuchukua nafasi ya Kiongera aliipatia Simba bao katika dakika ya 85.

Hadi mchezo huo unamalizika Simba walitoka kifua mbele kwa bao hilo na hivyo kuzikaribia Azam na Yanga.

Simba kwa matokeo hayo imefikisha pointi 27 sawa na Mtibwa Sugar lakini Wekundu hao wa Msimbazi wanapanda hadi nafasi ya tatu kutokana na kuwa na mabao 20 ya kufunga.

Azam wao wanaongoza ligi hiyo wakiwa na pointi 35 huku Yanga wakishika nafasi ya pili wakiwa na pointi 33.

Hatua hiyo inaashiria sasa timu hizo kongwe nchini zitakuwa zikichuana vikali kuwania ubingwa wa Tanzania Bara.

Ndanda: Jackson Chove, Aziz Sibo/Masud Ally, Ahmad Msumi, Hemed Koja, Salvator Ntebe, Jackoson Nkwera, Braison Raphael, Wilium Lucian, Omary Mponda, Atupele Green, Kig Makasi.

Simba: Vicent Angban, Emery Nimuobona, Mohamed Hussein, Abdul Banda, Jjuko Murshid, Justice Majabvi, Dany Lyanga, Mwinyi Kazimoto, Hamis Kiiza, Paul Kiongera/ Ibrahim Ajibu na Brian Majwega/Said Ndemla.

Mtanzania

Read More

Tambwe hazuiliki, Simba yajikwaa

Dar/Mikoani . Ni nani wa kumzuia Amissi Tambwe? Hilo ni swali linaloweza kuulizwa sasa na mashabiki, hali kadhalika mabeki wa timu pinzani baada ya jana mshambuliaji huyo wa Yanga kuifungia timu yake mabao mawili wakati timu yake ikiiadhibu Mbeya City kwa mabao 3-0, huku mtani wao, Simba ikikwama tena Kanda ya Ziwa.

Tambwe alimtungua mabao hayo kipa wa zamani wa timu hiyo na Simba, Juma Kaseja, dakika za 36 na 64, akitumia vyema pasi za Simon Msuva na beki Mwinyi Haji.

Kiungo Mzimbabwe, Thabani Kamusoko alikamilisha furaha kwa mashabiki wa Yanga kwa bao la tatu, dakika ya 66 na kufikisha mabao manne msimu huu.

Kwa idadi hiyo, Tambwe amefikisha mabao kumi akimpindua Elius Maguli wa Stand United ya Shinyanga aliyekuwa akiongoza aliyebaki na mabao tisa.

Shinyanga

Simba ambayo wiki iliyopita ilitoka sare ya bao 1-1 dhidi ya Toto Africans ya Mwanza katika mchezo ambao kocha Dylan Kerr alisingizia ubovu wa Uwanja wa CCM Kirumba uliojaa maji na utelezi kutokana na mvua iliyonyesha muda mfupi kabla ya mchezo huo, jana ililazimika kuchomoa bao dhidi ya Mwadui ya Shinyanga na kuambulia sare na pointi moja.

Kabla ya mchezo huo ambao kocha wa Mwadui, Jamhuri Kihwello ‘Julio’ aliapa kumfukuza kazi kocha wa Simba, Dylan Kerr kwa kipigo, alikaribia kucheka baada ya kiungo Nizar Khalfan kutangulia kufunga bao dakika ya 77. akimalizia kazi nzuri ya kiungo wa zamani wa Azam, Malika Ndeule.

‘Mtoto’ wa Azam, Brian Majwega akicheza mchezo wake wa kwanza akiwa katika uzi mwekundu aliisawazishia timu yake bao, dakika ya 85, akitumia mpira wa kiungo Mwinyi Kazimoto.

Tanga

Stand United ya Shinyanga iligeuka mwenyeji baada ya kuizima Coastal Union kwa mabao 3-1 katika mchezo uliofanyika kwenye Uwanja wa Mkwakwani.

Stand, ambayo moja iliyopita ililambishwa mabao 4-0 na Yanga, ilianza kusaka ushindi kwa bao la Haruna Chanongo, dakika ya 12, akitumia vyema pasi ya Hassan Banda, aliyeipa timu yake bao la pili, dakika ya 44.

Naye Frank Hamis aliiandikia Stand bao la tatu, dakika ya 55, lakini Coastal ilifuta machozi kwa bao la penalti, dakika ya 76 la Mnigeria, Abasilim Chidiebere, likiwa bao lake la kwanza msimu huu.

Msemaji wa Coastal, Oscar Assenga alisema timu yake ilizidiwa na wapinzani wao tangu dakika ya mwanzo na kupoteza mwelekeo, lakini ana imani makocha watarekebisha makosa hayo katika mechi zijazo.

Manungu

Vijana wa kocha Mecky Mazime, waliendelea kutumia vyema uwanja wa nyumbani baada ya kuiadhibu Mgambo JKT ya Tanga kwa mabao 3-0. Mashujaa wao walikuwa kiungo Henry Joseph, dakika ya 16, Said Bahanuzi, dakika ya 48 na Shiza Kichuya, dakika ya 77 ya mchezo huo.

Mtwara

Wenyeji Ndanda waliambulia kipigo cha mabao 3-1 kutoka kwa vijana wa kocha Abdallah Kibaden, JKT Ruvu waliopachika mabao yao kupitia kwa Hamis Thabit, dakika za 24, 37 na Saad Kipanga, dakika ya 63 huku Atupele Green akifunga la kujiliwaza, dakika ya 46 ya mchezo huo.

Imeandikwa na Charles Abel (Dar), Masoud Masasi (Shinyanga), Salim Mohammed (Tanga), Haika Kimaro (Mtwara)

Mwananchi

Read More